Browsing Tag

GG細語

資源庫

左丁山 -選舉遊戲

選舉遊戲

0

千呼萬喚始出來嘅「行政長官普選辦法公眾諮詢報告及方案」,卒於四月二十二日發表。叫秘書上網下載全份報告,佢話連埋附錄共四百頁,點打印呀,不如你在網上睇,睇鬼睇馬咩,網上睇呢類報告,擔保15分鐘內就會眼睛疲勞,跟住合埋眼養神,然後夢會周公,發夢香港有真正民主選舉。
於是只係讀一讀林鄭月娥在立法會宣讀嘅聲明,得知2017年行政長官普選嘅概要:(一)提名委員會有1200人,委員選舉方法,組成界別與現在嘅選舉委員會一樣,唔會變更,換言之,仍然係親建制派佔盡上風;(二)提名委員會每委員可提名兩人,要做特首參選人,至少需要得120個選舉委員提名支持,攞票攞到240張就要停,即係話參選人最少會有5人,最多會有10人。根據目前選舉委員會嘅成員比例,泛民派至少有百幾人,因此泛民要取得一個參選人席位,並不困難,以前梁家傑、何俊仁都攞到提名可參加競選特首啦。不過且慢歡喜住,還有第(三)點,中央已規定831決定不能更改,特首候選人最多只可以有3位,於是如果參選人有5至10名嘅話,只能有三個留低,其他要淘汰出局。淘汰方式就係10名(假設香港有咁多人發夢爭做特首)要向提名委員會做一場政治大騷,提交政綱、競選辯論、背後拉票諸如此類活動,務求爭取到601張(最低門檻,過半數)支持,先至可以正式成為特首候選人,泛民如有一至兩位參選人嘅話,到此相信會行人止步咯,泛民人士點會攞得到過半數選委支持吖!佢地係政府設計出嚟嘅陪跑分子啫,主要用途係做配角,向國際舞台表現香港有「民主」。第三階段之竅妙係每位選舉委員投票(不記名)支持誰人做候選人,可以投足N票,有10個參選人就可以投10票,有五個就可以投5票,至少都要投2票,咁搞法,最滑稽情況係10個參選人每個都有1200票,仲唔成為大笑話?又或者出現900票,800票,700票,第十名有601票嘅情況,由最多得票嗰3人中獎,得番三個特首候選人,進入第四階段:爭取五百萬合資格選民(登記選民未必有咁多)一人一票支持,票多者取勝,不理是否過到半數。第三階段之投票選候選人,有無限想像空間,肯定會出現半拉票,半配票嘅局面,至於誰人有資格配票,唔駛講到明啦,泛民參選人無謂妄想。 

左丁山

来源:

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20150428/19127510 

點擊->[這裡]<-,重溫更多經典文章!